பதிவு செய்யப்படாத பிறப்பினைப் பதிவு செய்தல்

பிறப்பு நிகழ்ந்து மூன்று மாதங்களுக்குள் பதிவு செய்யப்படாத சந்தர்ப்பத்தில், அத்தகைய பிறப்பைக் காலந்தாழ்ந்த பிறப்பாகப் பதிவு செய்து கொள்ள முடியும்.(சுற்றறிக்கை 8/2008-ஐப் பார்க்கவும்)

இதற்காகப் பிறப்பு மற்றும் இறப்புப் பதிவுச் சட்டத்தின் 24 ஆம் பிரிவின் கீழான ஒரு பிரகடனப் படிவத்தைப் பிறப்பு நிகழ்ந்த இடத்திற்குரிய பிரதேச செயலகத்தின் மேலதிக மாவட்டப் பதிவாளரிடம் சமர்ப்பிக்க வேண்டும். (மூன்று மாதங்கள் முதல் ஒரு வருட காலப்பகுதிக்குள் சமர்ப்பிக்கப்படும் பிரகடனப் படிவத்திற்கு, பிரதேச செயலகத்தின் மேலதிக மாவட்டப் பதிவாளர் அனுமதி வழங்க முடியும்.)

பிரகடனப் பத்திரத்தை சமர்ப்பிக்கத் தகுதியானவர்கள்,

•  பெற்றோரில் ஒருவர்
•  குழந்தையின் பாதுகாவலர்
•  அக்கறையுள்ள எவரேனும் ஒருவர்

பிரகடனப் படிவத்திற்கான கட்டணம் ரூ. 60.00 ஆகும்.

பிறந்த ஒரு வருடத்திற்குள் சமர்ப்பிக்கப்படும் பிரகடனப் பத்திரத்துடன் பின்வரும் ஆவணங்களும் சமர்ப்பிக்கப்படல் வேண்டும்.

• பெற்றோர் திருமணமானவர்கள் எனின், அவர்களின் திருமண சான்றிதழின் பிரதேச செயலகத்தினால் உறுதிப்படுத்தப்பட்ட பிரதி.
•  சம்பந்தப்பட்ட நபரின் (பிறப்புக்குரியவர்) பிறந்த திகதி மற்றும் இடத்தை உறுதிப்படுத்தும் பின்வரும் ஆவணங்களில் ஒன்று:
  • வைத்தியசாலைப் பிறப்பு அறிக்கை அல்லது அதன் உறுதிப்படுத்தப்பட்ட பிரதி.
  • கிராம அலுவலரின் அறிக்கை அல்லது அதன் உறுதிப்படுத்தப்பட்ட பிரதி (B23.)
  • தோட்டப் பிறப்பு அறிக்கை அல்லது அதன் உறுதிப்படுத்தப்பட்ட பிரதி.
  • குடும்ப நலச் சேவை உத்தியோகத்தரின் சான்றிதழ்.

மேற்கூறப்பட்ட ஆவணங்கள் எவையுமில்லாத பட்சத்தில், அவற்றுக்குப் பதிலாகப் பின்வரும் ஆவணங்களில் ஒன்று:

• சுகாதார மேம்பாட்டு அட்டை.
• ஞானஸ்நானச் சான்றிதழ்.
• பாடசாலை சேர்க்கை பதிவேட்டின் உறுதிப்படுத்தப்பட்ட பிரதி / மாணவர் தரவுப் புத்தகம். 
• தோட்ட நலன்புரி அதிகாரியின் அறிக்கை.
• பிறந்த திகதிக்கு அண்மித்த காலத்தில் கணிக்கப்பட்ட ஜாதகக் குறிப்பு.

இந்த ஆவணங்கள் எதனையும் பெற்றுக்கொள்ள முடியாதெனில், தெரிந்த விபரங்களை உள்ளடக்கிய பிரகடனப் படிவம் மற்றும் ஒரு சத்தியக்கடதாசி.

பிறப்பு நிகழ்ந்து ஒரு வருடம் கடந்த பின்னர் சமர்ப்பிக்கப்படும் பிரகடனப் படிவத்துடன் பின்வரும் ஆவணங்கள் சமர்ப்பிக்கப்பட வேண்டும்:

•  பிறப்பு பதிவு செய்யப்படவில்லை என்பதற்கான சான்றிதழ் (வெற்று சான்றிதழ்)
•  பெற்றோர் திருமணமானவர்கள் எனின், அவர்களின் திருமண சான்றிதழின் பிரதேச செயலகத்தினால் உறுதிப்படுத்தப்பட்ட பிரதி
• சம்பந்தப்பட்ட நபரின் (பிறப்புக்குரியவர்) பிறந்த திகதி மற்றும் இடத்தை உறுதிப்படுத்தும் பின்வரும் ஆவணங்களில் ஒன்று:
  • வைத்தியசாலைப் பிறப்பு அறிக்கை அல்லது அதன் உறுதிப்படுத்தப்பட்ட பிரதி. 
  • கிராம அலுவலரின் அறிக்கை அல்லது அதன் உறுதிப்படுத்தப்பட்ட பிரதி (B23). 
  • தோட்டப் பிறப்பு அறிக்கை அல்லது அதன் உறுதிப்படுத்தப்பட்ட பிரதி. 
  • குடும்ப நலச் சேவை உத்தியோகத்தரின் சான்றிதழ்.

மேற்கூறப்பட்ட ஆவணங்கள் எவையுமில்லாத பட்சத்தில், அவற்றுக்குப் பதிலாகப் பின்வரும் ஆவணங்களில் ஒன்று:

• சுகாதார மேம்பாட்டு அட்டை.
•  ஞானஸ்நானச் சான்றிதழ்.
• பாடசாலை சேர்க்கை பதிவேட்டின் உறுதிப்படுத்தப்பட்ட பிரதி / மாணவர் தரவுப் புத்தகம். 
• தோட்ட நலன்புரி அதிகாரியின் அறிக்கை.
• பிறந்த திகதிக்கு அண்மித்த காலத்தில் கணிக்கப்பட்ட ஜாதகக் குறிப்பு.

இந்த ஆவணங்கள் எதனையும் பெற்றுக்கொள்ள முடியாதெனின், தெரிந்த விபரங்களை உள்ளடக்கிய பிரகடனப் படிவம் மற்றும் ஒரு சத்தியக்கடதாசி.

பிறப்புச் சான்றிதழ் ஒன்றைப் பதிவு செய்வதற்குத் தேவையான சரியான தகவல்களை (வைத்தியசாலைப் பிறப்பு அறிக்கை/ கிராம உத்தியோகத்தர் அறிக்கை போன்ற பிறப்பை உறுதிப்படுத்தக்கூடிய ஆவணங்கள்) வழங்க முடியாத எவரேனும் ஒருவர், வயது மதிப்பீட்டுச் சான்றிதழ் ஒன்றைப் பெற்றுக்கொள்வதற்காகப் பிறந்த இடத்திற்குரிய பிரதேச செயலகத்தில் விண்ணப்பிக்க முடியும்.

தேவையான ஆவணங்கள்:

• பிரகடனப் பத்திரம் 
• ஆவண தேடல் முடிவுகள்
• சத்தியக் கடதாசி மற்றும் அறிக்கைகள்
• கிராம உத்தியோகத்தர் அறிக்கை
• பிறப்பை நிரூபிக்கக்கூடிய தகவல்
• பிறந்த திகதியை உறுதிப்படுத்தக்கூடிய ஆவணங்களைச் சமர்ப்பிப்பதன் மூலம் வயது மதிப்பீட்டுச் சான்றிதழில் பிறந்த திகதியைக் குறித்துக்கொள்ள முடியும்.

இது தொடர்பான மேலதிக விபரங்கள் தேவைப்படின், அருகிலுள்ள பிரதேச செயலகத்தின் மேலதிக மாவட்டப் பதிவாளர் அவர்களைத் தொடர்பு கொள்ளவும்.

பிறப்புப் பதிவுச் சுருக்கம் ஒன்றில்,

• 01 ஆம் நிரல் விபரங்கள் - பிறந்த திகதி மற்றும் பிறந்த இடம்.
• 02 ஆம் நிரல் விபரங்கள் - பெயர் உள்ளீடு செய்யப்படாத சந்தர்ப்பத்தில், பெயரொன்றை உள்ளீடு செய்வதற்கு அல்லது பிறப்புப் பதிவேட்டில் உள்ள பெயரொன்றைப் பின்னர் மாற்றுவதற்கு
• 03 ஆம் நிரல் விபரங்கள் - பால் (ஆண்/பெண்)
• 04 ஆம் நிரல் விபரங்கள் - தந்தையின் விபரங்களை (இனம் தவிர) திருத்தம் செய்வதற்கு 
• 05 ஆம் நிரல் விபரங்கள் - தாயின் அனைத்து விபரங்களும்  
• 06 ஆம் நிரல் விபரங்கள் - பெற்றோர் திருமணமானவரா / திருமணமாகாதவரா என்பது பற்றிய விபரம்
• 07 ஆம் நிரல் விபரங்கள் - பாட்டனின் விபரங்கள்
• 09 ஆம் நிரல் விபரங்கள் - அறிவிப்பவரின் விபரங்கள்

ஆகியவற்றைத் திருத்தம் செய்ய முடியும்.

அதற்குரிய அறிவித்தல் படிவத்தை, பிறப்பு நிகழ்ந்த இடத்திற்குரிய பிரதேச செயலகத்தின் மேலதிக மாவட்ட பதிவாளரிடம் சமர்ப்பித்தல் வேண்டும்.

பிரகடனப் படிவத்தை சமர்ப்பிக்க வேண்டியவர்கள்:

• பிறப்புச் சான்றிதழுக்குரிய நபர் 
• தந்தை அல்லது தாய்
• சட்டரீதியான பாதுகாவலர்
• பிறப்புப் பதிவில் உள்ள ஏதேனும் ஒரு விபரம் குறித்து திருப்தியடையாத ஒருவர்

பிரகடனப் படிவத்திற்கான கட்டணம் ரூ. 60.00 ஆகும்.

பிரகடனப் படிவத்துடன், திருத்தம் செய்யப்பட வேண்டிய பிறப்புப் பதிவேட்டின் உறுதிப்படுத்தப்பட்ட பிரதி ஒன்று கட்டாயமாக இணைக்கப்பட்டிருக்க வேண்டும். கோரிக்கையின் உண்மைத்தன்மையை உறுதிப்படுத்துவதற்கான எழுத்து மூலமான சான்றுகள் அதனுடன் சமர்ப்பிக்கப்பட வேண்டும்.

பிரகடனப் படிவத்தின் மூலம் முன்வைக்கப்பட்ட கோரிக்கையின் உண்மைத்தன்மையை உறுதிப்படுத்துவதற்காகப் பெற்றுக்கொள்ளக்கூடிய சில எழுத்து மூலமான சான்றுகள் உங்கள் வசதிக்காகக் கீழே தரப்பட்டுள்ளன.

• பெற்றோரின் திருமண சான்றிதழின் பிரதேச செயலகத்தினால் உறுதிப்படுத்தப்பட்ட பிரதி.
• பிள்ளைகளின் பெயர் பட்டியல் / சகோதரர்களின் பெயர் பட்டியல். 
• தந்தை மற்றும் தாயின் பிறப்புச் சான்றிதழ்களின் பிரதேச செயலகத்தினால் உறுதிப்படுத்தப்பட்ட பிரதிகள்.
• பெற்றோரின் திருமணப் பதிவுக்குப் பிறகு பிறந்த ஒரு பிள்ளையின் பிறப்புச் சான்றிதழ்  பிரதி.
• திருமணப் பதிவுக்குப் பிறகு பிறந்த பிள்ளை இல்லாத பட்சத்தில், சம்பந்தப்பட்ட பிள்ளையை விட மூத்த அல்லது இளைய பிள்ளையொருவரின் பிறப்புச் சான்றிதழ் பிரதி. 
• வைத்தியசாலைகள், மகப்பேறு விடுதிகளில் உள்ள பதிவுகளின் உறுதிப்படுத்தப்பட்ட பிரதிகள் அல்லது குடும்ப நலச் செவிலியரின் (Midwife) பதிவேட்டுப் பிரதிகள்.
• மாணவர் பதிவேடு, பாடசாலை அனுமதிப் பதிவேட்டின் பிரதி. 
• சம்பந்தப்பட்ட நபர் மற்றும் பெற்றோரின் பெயர்கள் அடங்கிய வாக்காளர் பட்டியலின் பிரதி.
• தந்தை இறந்திருப்பின், அவரது இறப்புச் சான்றிதழின் உறுதிப்படுத்தப்பட்ட பிரதி. 

தத்தெடுக்கப்படும் பிள்ளையின் வயது 14 வருடங்களுக்கு மேல் இருக்கக்கூடாது.

விண்ணப்பதாரர் பூர்த்தி செய்ய வேண்டிய தகுதிகள்:

• விண்ணப்பதாரரின் வயது 25 வருடங்களுக்கு மேல் இருக்க வேண்டும்.
• பிள்ளையைத் தத்தெடுக்க விண்ணப்பிப்பவருக்கும் அத்தொடர்புடைய பிள்ளைக்கும் இடையிலான வயது வித்தியாசம் குறைந்தது 21 வருடங்களாக இருக்க வேண்டும்.
• அத்தொடர்புடைய பிள்ளை விண்ணப்பதாரரின் வாரிசாகவோ அல்லது விண்ணப்பதாரரின் சகோதர/சகோதரியின் பிள்ளையாகவோ அல்லது அவர்களின் வாரிசாகவோ அல்லது அவர்களின் திருமணத் துணையின் பிள்ளையாகவோ இருந்தால் மேற்கூறிய வயது வித்தியாசம் பொருந்தாது.

தத்தெடுக்கப்படும் குழந்தை 10 வயதுக்கு மேற்பட்டவராக இருந்தால் குழந்தையின் இணக்கப்பாடு அவசியமாகும்.

சமர்ப்பிக்கப்படும் சான்றிதழ்கள் மற்றும் ஆவணங்களின் அடிப்படையில், தத்தெடுப்பதற்கான கட்டளையை மாவட்ட நீதிமன்றமே பிறப்பிக்கும்.

நீதிமன்றத்தின் அந்தக் கட்டளையின் அடிப்படையில் (படிவம் 4), தத்தெடுத்தல் தொடர்பான சான்றிதழை (படிவம் B143) பதிவாளர் நாயகம் திணைக்களம் வழங்கும். அதன் மூலம் தத்தெடுக்கப்படும் பிள்ளையின் பிறப்பை மீண்டும் பதிவு செய்து கொள்ளலாம்.

பிறப்பை மீள்பதிவு செய்துகொள்வதற்காகப் பதிவாளர் நாயகம் திணைக்களத்தின் தலைமை அலுவலகத்தில் பின்வரும் ஆவணங்களை சமர்ப்பித்தல் வேண்டும்.

• பிறப்பை மீண்டும் பதிவு செய்வதற்கான விண்ணப்பப் படிவம் (B149).
• பெற்றோரின் திருமண சான்றிதழின் பிரதேச செயலகத்தினால் உறுதிப்படுத்தப்பட்ட பிரதி.
• தாய் மற்றும் தந்தையின் பிறப்புச் சான்றிதழ்களின் உறுதிப்படுத்தப்பட்ட பிரதிகள்.
• பிள்ளைக்கு ஏற்கனவே பிறப்புச் சான்றிதழ் பதிவு செய்யப்பட்டிருந்தால் அந்தச் சான்றிதழ், அல்லது பதிவு செய்யப்படவில்லை எனின் அதற்கான தேடல் முடிவு அறிக்கை (Nil Result). 

பிறப்பை மீண்டும் பதிவு செய்வதற்காக மேற்கூறிய தகவல்களுடன் சரியாகச் சமர்ப்பிக்கப்பட்ட விண்ணப்பப் படிவமானது, பிள்ளை பிறந்த இடத்திற்குரிய பிரதேச செயலகத்திற்கு பதிவாளர் நாயகம் திணைக்களத்தினால் அனுப்பி வைக்கப்படும்.